Cuireadh fáilte roimh phlean gnímh na Roinne Oideachais agus Scileanna le déanaí maidir le moltaí an Bhoird Chomhairligh de chuid an Fhóraim ar Phátrúnacht agus Iolrachas san earnáil bhunscolaíochta.
Bhunaigh an tAire Oideachais agus Scileanna Ruairí Quinn an Fóram Pátrúnachta agus Iolrachais san earnáil bhunscolaíochta i mí Aibreáin na bliana seo le taighde á reáchtáil bunaithe ar éileamh agus soláthar ar phátrúnacht scoile ar fud na tíre.
Beartaíodh mar chuid den phlean a fógraíodh ar an Déardaoin seo caite, go reáchtálfar suirbhé i 44 ceantar ar fud na tíre ina n-iarrfar ar thuismitheoirí daltaí bunscoile a rogha pátrúnachta scoile a léiriú.
Táthar ag súil go mbronnfar pátrúnacht scoile i gceantair éagsúla ag brath ar an éileamh a léireofar i dtorthaí an tsuirbhé a reáchtálfar i bhfómhar na bliana seo.
Ag freastal ar an bpobal
Iarrfar ar thuismitheoirí an cineál pátrúnachta scoile ab fhearr leo a roghnú astu seo: an Eaglais Chaitliceach; Educate Together (an grúpa il-sainchreidmheach); An Ghaelscolaíocht; An Coiste Gairmoideachais agus eile.
Reáchtálfar an suirbhé i 44 ceantar ar fud na tíre ina bhfuil daonra bunaithe, easpa ilchineálachta bunscolaíochta agus barraíocht oideachais Chaitlicigh. Creidtear go dtabharfaidh an suirbhé deis do thuismitheoirí a bheith gníomhach sa chineál oideachais a chuirfear ar a bpáistí den chéad uair riamh ós rud é go mbunófar scoileanna nua ag brath ar éileamh phátrúnacht an cheantair sin.
Tá sé molta ag an mBord Comhairleach go ndéanfar freastal ar rogha gach pobail tríd an gcóras oideachais oiriúnach a chur ar fáil ann agus go mbunófar pátrúnacht scoileanna nua ar thuairimí an phobail áitiúil.
Moltar freisin i gcás scoileanna reatha, go n-aistreofar pátrúnacht ó scoileanna Caitliceacha bunaithe má ghlacfar leis go bhfuil éileamh ar éagsúlacht oideachais in áit foirgneamh agus scoileanna nua bhunú.
Tuairim an Foras Pátrúnacht
Chuir An Foras Pátrúnachta fáilte roimh moltaí an Bhoird Chomahirleach agus cinneadh an Rialtas go ndéanfar anailís ar mholtaí an Bhoird gan mhoill. Dúirt
Ard-Rúnaí An Foras Pátrúnachta, Caoimhín Ó hEaghra, go bhfuil “an Roinn Oideachais agus Scileanna ag tabhairt níos mó roghanna do thuismitheoirí, sa phróiséas seo, ar an gcineál scoil gur mian leo ó thaobh an meán teagaisc agus sainspiorad na scoile.”
Glacfaidh na forais pátrúnachtaí éagsúla páirt lárnach sa phróiseas eolais a dtabharfaidh an Roinn Oideachais agus Scileanna faoi sula gcuirfear tús leis an suirbhé ar-líne sa Fómhar.
Tá grúpaí áitiúla bunaithe ag an ngrúpa il-sainchreidmheach Educate Together cheana féin lena chuid éiteas oideachais féin a chuir os comhair na bpobal a mbeidh páirteach sa suirbhé mar rogha scolaíocht dá bpáistí.
Dúirt Príomhfheidhmeannach Educate Together, Paul Rowe, gur sainchomhartha in oideachas na hÉireann é go gcuirfear moltaí an Bhoird Chomairleach i bhfeidhm, agus go bhféadaí pátrúnacht scoile reatha a aistriú ó chóras sainchreidmheach go córas eile, ar nós Educate Together ag braith ar theastálacha an phobail. Cuireann an grúpa lán-fáilte roimh an bhforbairt seo a ndéanfaidh éagsúlacht bhunscolaíocht na hÉireann a mhéadú sna blianta romhainn.
Beidh An Foras Pátrúnachta ag súil lena éiteas gaeloideachais féin a chur chun cinn mar rogha scolaíochta le linn an phróisis eolais. Dúirt Caoimhín Ó hEaghra, “mar phátrún, táimid ag freastal ar éagsúlacht inár scoileanna agus tugann an pátrún roghanna de shainspiorad Caitliceach, Idirchreidmheach agus Ilchreidmheach trí mheán na Gaeilge.”
Foilsithe ar Gaelport.com - 26 Meitheamh 2012
Seans go mbeidh spéis agat sna scéalta a leanas:
As na Nuachtáin - 50 towns to see handover of school patronage
As na Nuachtáin - Quinn questions school emphasis on Irish, religion
Lean an scéal seo agus @Gaelport ar Twitter: #Gaeilge #Gaelscolaíocht