Fógraíodh inné go bhfuil téarmaí díolacháin an Chrannchur Náisiúnta curtha i dtoll a chéile ag an Rialtas agus go bhfuiltear ag súil na céadta milliúin a fháil ó dhíolacháin an cheadúnais, ceadúnas a mhairfidh thar tréimhse 20 bliain.
Tá ról lárnach ag an gCrannchur Náisiúnta ag bailiú na céadta milliún don Rialtas le dáileadh ar dhea-chúiseanna ar fud na hÉireann lena n-áirítear cúiseanna spóirt, sláinte agus teangeolaíocha. Cuireann an Crannchur Náisiúnta maoiniú ar fáil tríd an Rialtais d’eagrais agus d’instituidí eile a bhfuil ag cur na Gaeilge chun cinn trí Chiste na Gaeilge.
I measc na n-eagras a bhfuair tacaíocht airgeadais ó Chiste na Gaeilge tá, An Cumann Scoildramaiochta, Gael-Taca, Gaillimh Le Gaeilge, Gnó Mhaigh Eo agus Ollscoileanna a bhfuil ag múineadh cúrsaí Gaeilge ar fud na cruinne.
Bronnadh €368,000 ar Fiontar, Ollscoil Chathair Bhaile Átha Cliath in 2009 chun bunachar sonraí a fhorbairt do théarmaiocht na Gaeilge a bhaineann leis an Aontas Eorpach. Cuireadh deontas bliantúil de € 165,068 ar fáil d’Acadamh Ríoga na hÉireann i leith thionscadal foclóra Nua-Ghaeilge sa bhliain chéanna agus tugadh €700,000 d’instituidí triú leibhéil a bhfuil ag iarraidh líon na gcainteoirí Gaeilge a mhéadú ar fud na cruinne.
Cé go bhfuil laghdú tagtha ar Chiste na Gaeilge ón bhliain 2009 tá an Crannchur Náisiúnta ag cur, ar an meán, 63% de luach iomlán an Chiste ar fáil ó bhí 2009 ann.
Ag labhairt dó faoi Chiste na Gaeilge, dúirt Kevin De Barra, Stiúrthóir Gníomhach ar Chomhdháil Náisiúnta na Gaeilge go bhfuil sé “fíorthábhachtach go dtabharfaidh pé dream a fhaigheann an conradh seo sa todhchaí tosaíocht do chur chun cinn na teanga, trí mhaoiniú a chur ar fáil do Chiste na Gaeilge. Tá maoiniú curtha ar fáil le blianta beaga anuas tríd an ciste seo do scoláireachtaí Fulbright agus do theagascóirí Gaeilge i 40 ollscoil timpeall na cruinne, rud atá fíor luachmhar i dtaobh feiceálacht agus foghlaim na teanga thar lear”.
Tá sé i gceist ag an Rialtas go mbeidh an ceadúnas nua i bhfeidhm i mí Iúil 2013 agus cuirfear fáilte roimh iarratais don cheadúnas go luath in 2013.
© Foilsite ar Gaelport.com 05 Aibreán 2012