Tháinig Seanadóirí le chéile Déardaoin don dara uair chun Bille na Gaeltachta 2012 a phlé. Tá an Bille á phlé ag leibhéal an Choiste sa Seanad faoi láthair rud a chiallaíonn go bhfuil na Seanadóirí ag déanamh imscrúdú ar an mBille alt de réir ailt agus ag moladh leasuithe.
In iomlán tá 160 leasú molta don Bhille. Cé gur caitheadh beagnach trí uair an chloig ag plé an Bhille, agus go raibh neart ceisteanna freagartha ag an Aire Stáit Mc Ginley, T.D., níor éirigh leis na Seanadóirí ach cúig leasú as an 160 a phlé Déardaoin seo caite.
Moladh arís gan teorann ama a chur leis an mBille seo, an chéad Bille Gaeltachta ó 1956. Dúirt an Seanadóir Sean Barrett go bhfuil cearta áirithe ag lucht labhartha mhionteangacha agus gur cheart tuairim na ngeallsealbhóirí uile a thabhairt san áireamh agus gur chóir measúnú ar thionchar rialála a dhéanamh sula n-achtófar an Bille.
Chuir an tAire Mc Ginley T.D., in iúl go raibh an Bille faofa ag na Ranna Rialtais agus go bhfuil Oifig an Ard-Aighne sásta go bhfuil an Bille bunreachtúil. Ceistíodh na sábháiltí de €100,000 in aghaidh na bliana atá luaite sa Bhille toisc leasuithe beartaithe ar an Acht um Údarás na Gaeltachta 1976. Mhínigh an tAire go mbeidh airgead le sábháil de bharr go mbeadh líon na mball ar an mBord níos lú chomh maith le níos lú cruinnithe de choistí réigiúnach agus laghdú i gcostais riaracháin. Ceistíodh freisin an figiúr de €500,000 atá le sábháil de réir an Bhille toisc nach mbeidh toghchán i gceist do cheapachán Bhord Údarás na Gaeltachta.
Beidh tuilleadh plé ar an gceist seo Dé Céadaoin 4 Iúil agus Déardaoin 5 Iúil, ag Leibhéal an Choiste, agus tá súil go ndéanfar tuairisciú don Seanad an tseachtain seo chugainn, agus go bhfágfaidh an Bille an Seanad ag an bpointe sin, ach go leanfaí le tuilleadh plé ar an gceist seo sa Dáil.
© Gaelport.com 02 Iúil 2012
Seans go mbeidh spéis agat sna scéalta a leanas:
''Easpa Ionadaíochta'' a deir Comhdháil Náisiúnta na Gaeilge faoi Bhille na Gaeltachta
Lean an scéal seo agus @Gaelport ar Twitter: #Gaeilge #Gaeltacht