Deontas ceadaithe don Ghaelacadamh i gConamara

Tá fógartha ag Aire Stáit na Gaeltachta Dinny McGinley T.D  inniu go bhfuil deontas €20,000 le bronnadh ar scoil cheoil an Ghaelacadaimh i  gConamara.

Chuir Deirdre Nic Chonaonaigh ón nGaelacadamh fáilte roimh an nuacht inniu.  “Is laghdú deich faoin gcéad é ar an deontas a cuireadh ar fáil dúinn anuraidh” a dúirt  sí, “ach cinnte tá sé iontach go bhfuil  an Roinn tar éis maoiniú a bhronnadh orainn arís i mbliana”.

Is é an Roinn Ealaíon Oidhreachta agus Gaeltachta an maoinitheoir is mó atá ag an nGaelacadamh agus tagann an chuid eile de bhuiséad na heagraíochta ó tháillí a ghearrtar ar thuismitheoirí na gceoltóirí óga.

Bunaíodh an scoil cheoil ag tús na nOchtóidí agus cuirtear ranganna ar fáil i nGaeltacht Chonamara agus ar Árainn. Tá an scoil lonnaithe ar an Spidéal ach bíonn ranganna ceoil, amhránaíochta agus rince ar siúl i gCárna, i gCeantar na nOileán, Cois Fharraige agus sna bunscoileanna  sa cheantar máguaird.

“Tá ról lárnach agus leanúnach ag an nGaelacadamh i gcur chun cinn cultúr dúchasach sainiúil na Gaeltachta agus táimid go mór faoi chomaoin dóibh féin agus na múinteoirí atá fostaithe acu, agus is léir go bhfuil toradh fiúntach ar a gcuid oibre” a dúirt an tAire Stáit inniu.

© Foilsithe ar Gaelport.com 13 Iúil 2012