Fógraíodh an tseachtain seo caite go leanfar leis an scéim fhorbartha ghearrscannánaíochta Gaeilge ‘Scéal’ don dara bliain as a chéile.
Síolraithe ó na scéimeanna Síol agus Údar tugann an dara sraith de ‘Scéal’ deis luachmhar do scríbhneoirí agus stiúrthóirí le Gaeilge agus iad ag teacht ar an bhfód, saothar Gaeilge ón litríocht nó ón mbéaloideas a athchóiriú don scáileán teilifíse.
Roinntear an próiseas ina dhá leath – ar dtús glacfar le hiarratais ó scríbhneoirí a rogha scéil nó dán a fhorbairt ón mbun saothar go dtí leagan athchóirithe don teilifís ansin roghnófar stiúrthóirí úra le fís na scríbhneoirí a thabhairt chun crích agus an script a aistriú do dtí an scáileán.
Cuireadh tús leis an scéim Síol sa bhliain 2008 le maoiniú ó TG4 agus Coimisiún Craolacháin na hÉireann agus rinneadh forbairt ar 6 scannán nuachumtha faoin teideal ‘An Chlann’.
Bliain ina dhiaidh sin leanadh leis an scéim faoi theideal éagsúil, ‘Údar’, agus í bunaithe ar athchóiriú ó litríocht na Gaeilge go dtí script scáileáin. Rinneadh athchóiriú ar shaothair mhóra sa litríocht An t-Ádh le Pádraic Ó Conaire, Seacht gCéad Uaireadóir le Mícheál Ó Conghaile agus An Buille le Liam Ó Flaithearta ina measc.
Ba ag leanúint le rathúlacht na scéime seo a osclaíodh scéim ‘Scéal’ anuraidh agus ní fada go mbeidh sé scannán úra le feiceáil ar scáileán TG4 i 2013.
Fáiltíonn scéim ‘Scéal 2’ roimh scríbhneoirí Gaeilge, bíodh taithí scáileáin acu nó ná bíodh agus roimh stiúrthóirí ag lorg taithí ó thaobh stiúradh na drámaíochta Gaeilge de ach ní mór d’iarrthóirí a bheith líofa sa teanga.
Cuirfear gearrliosta le chéile as na hiarratais go léir agus freastalóidh na scríbhneoirí ar cheardlanna scríbhneoireachta faoi stiúir eagarthóra scripte. Roghnófar na scripteanna is fearr as sin.
Is féidir teacht na shonraí ar fad ar www.tg4.ie/sceal agus is é 24 Lúnasa an spriocdháta le haghaidh iarratas.
© Foilsithe ar Gaelport.com - 13 Iúil 2012
Seans go mbeidh suim agat sna scéalta seo a leanas:
Gaeilgeoirí ag a bhfuil dúil sa ‘Coddle’ ag teastáil
Seirbhís nuachta Gaeilge 'Meon Eile' Seolta
Raidió Rí-Rá ar fáil ar an gcóras DAB
Lean an scéal seo agus @Gaelport ar Twitter: #Gaeilge