Freastalóidh tríocha saoránach de chuid Stáit Aontaithe Mheiriceá ar chúrsaí Gaeltachta i mbliana mar chuid de scéim atá á reáchtáil ag an gCoimisiúin Fulbright.
Bhronn Aire Stáit na Gaeltachta Dinny McGinley TD dámhachtainí samhraidh Gaeltachta ar na foghlaimeoirí Gaeilge i nGleann Cholm Cille ar 17 Iúil.
Beidh na scoláirí ag freastal ar chúrsaí in Áras Mháirtín Uí Chadhain An Cheathrú Rua; Scoil Samhraidh Idirnáisiúnta, Ollscoil na hÉireann Gaillimh; Oideas Gael, Gleann Cholm Cille agus in Oidhreacht Chorca Dhuibhne, Baile an Fheirtéaraigh.
Tugann na dámhachtainí seo deis do na buaiteoirí freastal ar chúrsaí samhraidh Gaeilge sa Ghaeltacht. Oibríonn an scéim seo i gcomhpháirtíocht le Coimisiún Fulbright ar mhaithe leis an nGaeilge a chur chun cinn i Stáit Aontaithe Mheiriceá agus nasc dlúth a chruthú idir an dá chultúr.
Tá na scoláireachtaí maoinithe ag Roinn na Gaeltachta agus ag an Crannchur Náisiúnta agus íocann an deontas as costais lóistín agus táillí teagaisc na rannpháirtithe ach is iad féin a chlúdaíonn gach costas eile.
Is í seo an dara bliain as a chéile don scéim a bheith á reáchtáil agus tugtar seans iontach do na buaiteoirí arbh as Wisconsin, Illinois, California, Texas, Montana, Nua Eabhrac, Connecticut agus Minnesota araon, aithne mhaith a chur ar theanga, ar chultúr agus ar phobal na Gaeltachta, rud dar ndóigh nach bhfuil fáil air go héasca don té a dhéanann staidéar ar an teanga lasmuigh den tír.
Agus tugann scéimeanna mar seo deis luachmhar do gheilleagar na hÉireann agus do gheilleagar na Gaeltachta ach go háirithe, dar le stiúrthóir na scéime, Colleen Dube, “Mar aon le tacaíocht a thabhairt d’fhoghlaimeoirí na Gaeilge sna Stáit tá na Dámhachtainí Gaeltachta ag soláthar buntáistí follasacha do gheilleagar na hÉireann
"Mar aon lena gcuid ama, tá an 30 rannpháirteach ag caitheamh a gcuid airgid féin ar tháillí eitilte idirnáisiúnta agus ar chostais taistil, lóistín agus siamsaíochta breise fhad is atá siad anseo in Éirinn. Is eiseamláir shármhaith iad na dámhachtainí seo de chomhpháirtíocht phríobháideach phoiblí in earnáil na turasóireachta cultúrtha”, a dúirt sí.
Tá tuilleadh eolais ar fáil ag www.fulbright.ie.
© Foilsithe ar Gaelport.com - 18 Iúil 2012
Seans go mbeidh suim agat sna scéalta a leanas:
Tacaíocht léirithe ag Comhairle Contae Chiarraí don Choimisinéir Teanga
Samhail Mhaoinithe #2: Comhairleoir á lorg
Lean an scéal seo agus @Gaelport ar Twitter: #Gaeilge