Faoin gclár nua, cruthófar gréasán náisiúnta de thuismitheoirí a theastaíonn uathu a bpáistí a thógáil trí Ghaeilge. Cé go n-íoctaí €260 le teaghlaigh Ghaeltachta faoi Scéim Labhairt na Gaeilge, sa chás gur shásaigh siad critéir na Roinne gurb í an Ghaeilge príomhtheanga labhartha na clainne, ní íocfar aon deontas chuig teaghlaigh faoin gclár nua.
Dhírigh Scéim Labhairt na Gaeilge ar pháistí sa Ghaeltacht, in aois scoile, ach cuirfear tacaíocht ar fáil faoin gclár nua do thuismitheoirí sna 26 contae, sula dtéann a bpáistí ar scoil.
Leagfaidh an clár nua an-bhéim ar scaipeadh eolais; scaipfear pacáistí eolais ar bhuntáistí an dátheangachais, agus ar na seirbhísí tacaíochta oideachais agus sláinte atá ar fáil dóibh siúd a roghnaíonn a gclann a thógáil trí Ghaeilge.
Tuigtear go mbeidh coiste stiúrtha á chur le chéile go luath mar chuid den chlár, agus samhlaítear go mbeidh ionadaithe ó réimsí difriúla ar nós stiúrthóirí naíonraí, múinteoirí, ionaid tacaíochta teaghlaigh agus ionadaithe de chuid Fheidhmeannacht na Seirbhíse Sláinte ar an gcoiste stiúrtha seo. Ní fios go fóil cén struchtúr a bheidh leis an gcoiste stiúrtha seo, nó cén ról sonrach a bheidh ann dó.
Cé go raibh lochtanna ar leith ag baint le Scéim Labhairt na Gaeilge, bhíodh torthaí na scéime sin an-úsáideach mar shlat tomhais ar láidreachtaí na gceantar éagsúla Gaeltachta. Baineadh úsáid as na torthaí seo mar chritéir do scéimeanna deontais eile de chuid na Roinne Ealaíon Oidhreachta agus Gaeltachta, ach ní léir leis an gcóras nua, cén cineál measúnaithe a gcuirfear i bhfeidhm do scéimeanna eile na Roinne.
Ní hé an Clár Tacaíochta Teaghlaigh amháin a sheolfar inniu in Indreabhán, mar go mbeidh an tAire Dinny McGinley, TD, ag fógairt clár eile freisin, Próiseas Pleanála Teanga. Tuigtear go bhfuil sé cheantar ar leith roghnaithe ag an Roinn Ealaíon Oidhreachta agus Gaeltachta, agus go n-iarrfar ar na pobail sin, plean teanga a cheapadh i gcomhar leis an Roinn.
Beidh tuilleadh eolais faoin dá chlár thuas ar fáil um thráthnóna, agus beidh an scéal againn ar Gaelport.com, a luaithe is a fhógróidh an tAire é!
© Gaelport.com - 26 Aibreán 2012
Seans go mbeidh suim agat sna scéalta seo a leanas:
Straitéis níos láidre á lorg don Chlár Tacaíochta Teaghlaigh
“Easnaimh Mhóra” i gcur i bhfeidhm Acht na dTeangacha Oifigiúla
Príomhfheidhmeannach nua ar Údarás na Gaeltachta ceaptha
Lean an scéal seo agus @Gaelport ar Twitter: #Gaeilge