Tá fáilte roimh chách bheith i láthair nuair a sheolfar DVD úr, ‘Céim Chun Tosaigh’ de chuid Chomhdháil Náisiúnta na Gaeilge agus Chomhar na Múinteoirí Gaeilge ag Oireachtas na Samhna i Leitir Ceanainn.
Is é ‘Céim Chun Tosaigh, ag obair le Gaeilge’ an dara cuid de shraith DVD a bhaineann le foghlaim agus le cur chun cinn na Gaeilge sa tsraith shinsearach ag an dara leibhéal. Seoladh Cuireadh Chun Cainte, treoir phraiticiúil do Bhéaltriail na hArdteiste, an tráth seo anuraidh agus cuireadh an pacáiste gairmthreorach seo le chéile mar ábhar tacaíochta ag leanúint uaidh.
Oibríonn ‘Céim Chun Tosaigh’ mar thaca do mhúinteoirí Gaeilge agus mar fhoinse eolais do dhaltaí sa tsraith shinsearach, a léiríonn nach gá gurb í an Ardteist an teagmháil deiridh a bheidh acu leis an nGaeilge. Agus é ag freastal ar 32 contae, dírítear ar earnálacha ilghnéitheacha le gur féidir dul i bhfeidhm ar gach dalta le réimse leathan gairmeacha.
Curtha i láthair ag Ciarán Ó Conghaile agus Sibéal Davitt, cloisimid scéal beathaisnéise ó aisteoir, ealaíontóir, preas-oifigeach san arm, múinteoir ríomhaireachta, dlí-theangeolaí, ateangaire, tuairisceoir nuachta, múinteoir Gaeilge thar lear, stiúrthóir naíonra, agus múinteoir surfála ar chuidigh an Ghaeilge go mór leo spriocanna uaillmhianacha a bhaint amach ó thaobh gairme de.
Is í an craoltóir de chuid BBC agus TG4, Lynette Fay, a sheolfaidh an DVD go hoifigiúil ag 5.00pm ar an Aoine 2 Samhain ag Seomra Glendowan, Óstan Mount Errigal. Taispeánfar an clár iomlán mar chuid den seoladh agus cuirfear deochanna agus sólaistí ar fáil. Beidh an clár ar fáil amach anseo ar YouTube, mar DVD agus mar chlár teilifíse ar TG4.
© Foilsithe ar Gaelport.com - 16 Deireadh Fómhair 2012
Seans go mbeidh spéis agat sna scéalta a leanas:
Aip ghréasáin nua seolta ag Gaelport.com #Gtuíteanna eile beartaithe ag Gaelport
Gaelport.com mar urraitheoir ag Gradaim Idirlín na hÉireann 2012
Buntáiste Breise na Gaeilge le plé san oirdheisceart
Lean an scéal seo agus @Gaelport ar Twitter: #Gaeilge