Cruinnithe beartaithe maidir le pleananna teanga sa Ghaeltacht

Tuigtear do Gaelport.com nach bhfuil na ceantair roghnaithe go fóill ach tá an chosúlacht ann go dtosófar le roinnt de na ceantair is mó a bhfuil cainteoirí laethúla Gaeilge iontu. 

Fógraíodh an cinneadh ag cruinniú de Bhord Údarás na Gaeltachta sna Forbacha i gContae na Gaillimhe,  Dé hAoine 01 Feabhra 2013.

Eagrófar réamh-chruinniú leis na heagraíochtaí pobail sna trí réigiún leis an gcur chuige, ceantair fheidhme, na spriocanna a mhíniú agus le comhaontú a fháil uatha a bheith páirteach sa phróiseas. Nil dátaí na gcruinnithe socruithe go fóill ach táthar ag súil go bhfógrófar go luath iad.

Is é an sprioc atá ag bpróiseas pleanála teanga ná córas pleanála teanga a fhorbairt chun a chinntiú go mairfidh an Ghaeilge mar theanga pobail agus teaghlaigh sa Ghaeltacht.

Is í seo an chéim is déanaí i bhforbairt an phróisis pleanála teanga ó foilsíodh Acht na Gaeltachta 2012. 

Aontaíodh chomh maith nach gcuirfear aon bhac le haon limistéar nó aon ghrúpa atá ag iarraidh tús a chur leis an bpróiseas agus cuirfidh an tÚdarás gach tacaíocht ar fáil dóibh.

Tá pleananna teanga i bhfeidhm cheana féin i gceantair áirithe ach ní raibh feidhm reachtúil leo. Faoin gcóras nua,  is faoin Roinn Ealaíon, Oidhreachta agus Gaeltachta a bheidh sé measúnú a dhéanamh ar phleananna teanga sula ndéanfar iad a fhaomhadh. Beidh an Roinn freagrach freisin as athbhreithniú a dhéanamh ar chur i bhfeidhm na bpleananna.