Sheol Diaga Teo aip nua dírithe ar mhuintir na Gaeilge i mBaile Átha Cliath an tseachtain seo.
Cruthaíonn aip Anseo nasc digiteach idir lucht labhartha na Gaeilge timpeall na tíre idir fhoghlaimeoirí, ghnólachtaí, ghrúpaí pobail nó cultúrtha, scoileanna agus eagraíochtaí Gaeilge eile.
Seoladh an aip in oifigí Fhoras na Gaeilge, Cearnóg Muirfean, Baile Átha Cliath.
Seoladh an aip in oifigí Fhoras na Gaeilge, Cearnóg Muirfean, Baile Átha Cliath.
Príomhaidhm na haipe, atá le fáil anois ar Shiopa Aipeanna Apple agus an margadh Android, ná gréasáin a chruthú i measc Ghaeilgeoirí uile na tíre trí chóras suite domhanda. Úsáidtear an aip le cainteoirí eile sa cheantar a aimsiú chomh maith le comhlachtaí agus eagraíochtaí Gaeilge, agus is féidir teacht ar ócáidí Gaeilge sa cheantar freisin.
Is iad Colum Óg Mac Lochlainn, Ciarán Mac Lochlainn, Anicka Krajickova agus Michael Flanagan as Bun Cranncha i nDún na nGall a d’fhorbair an aip Anseo, maoinithe ag Foras na Gaeilge tríd an tionscnamh Nuálaíocht i Réimse an Ghnó.
“Tá an réabhlóid ag teacht” is ea sluán na haipe nua, agus is cinnte gur forbairt shuntasach é aip Anseo i dtaobh Ghaeltacht dhigiteach agus nasc nua-aimseartha a chruthú idir lucht labhartha na Gaeilge.
Is é seo an chéad chéim eile i gcur chun cinn na Gaeilge sna meáin shóisialta, le leithéidí www.abairleat.com ag dul ó neart go neart agus an #Gtuít ar Twitter feicthe cheana féin.
Tá tuilleadh eolais ar an aip ar fáil ar www.anseoapp.com.