Beidh Féile Ealaíne An Earagail ar siúl i nDún na nGall ón 7-22 Iúil 2012. Tá an fhéile seo ar an fhód le ceithre bhliana is fiche anois agus le blianta anus tá an fhéile ag dul ó neart go neart.
Beidh neart imeachtaí cultúrtha ar siúl le linn fhéile na bliana seo - ina measc beidh léamh filíochta, damhsa, ceol gaelach, ceardlann cois farraige, ceardaíocht, imeachtaí amharclainne, taispeántais scannáin amuigh faoin spéir, seó puipéid beo, taispeántais ealaíne agus ghrianghrafadóireachta, ceolchoirmeacha , seisiúin cheoil in Ionad Cois Locha i nDún Lúiche, siamsaíocht sráide chomh maith le dhá lá d’imeachtaí ar oileán Thoraí le linn Fhéile Soilse Thoraí.
Cuirfear tús le taispeántas ealaíne sa Gailearaí i nGaoth Dobhair ar an 7 Iúil agus ar an 9 Iúil beidh Finscéal leis an gcomhlacht puipéadóireachta, amharclannaíochta agus drámaíochta Gaeilge Fíbín ar siúl i gColáiste Bhríde Rann na Feirste. Beidh an file aitheanta Cathal Ó Searcaigh ag léamh filíochta sa Dámhlann an Ghleanna i nGort an Choirce.
Ón 14-15 Iúil beidh ceiliúradh mór á dhéanamh ar thrá Mhachair Rabhartaigh le taispeántas dealbhóireachta atá á eagrú ag An Cosán Glas. Anuas air seo beidh Aisteoirí Ghaoth Dobhair ag léiriú dráma dá gcuid san Amharclann An Grianán.
Beidh cuid de na hamhránaithe is cumasaí in Éirinn ag seinm ceoil agus ag canadh le linn na féile, ina measc beidh an ceoltóir agus amhránaí Liam Ó Maonlaí ón ngrúpa clúiteach The Hot House Flowers agus Rónán Ó Snodaigh ón ngrúpa Kíla ar stáitse i Leitir Ceanainn ar an 16 Iúil.
Beidh an comhlacht puipéid Púca Puppets ag cur an tseó Tic Teac ar stáitse in Ionad Teampall Chroíne, ar An gClochán Liath ar 18 Iúil agus arís in Ionad Naomh Pádraig ar an 19 Iúil.
Tuilleadh eolais:
Guthán: +353 (0)74 916 8800
R-phost: info@eaf.ie
Suíomh gréasáin: www.eaf.ie
Fáilte Uí Cheallaigh roimh chách!
© Foilsithe ar Gaelport.com - 12 Meitheamh 2012
Seans go mbeidh suim agat sna scéalta a leanas:
Oíche Albanach ‘Ar an gCarraig’
CD nua Shaileog á sheoladh i gCarna
Lean an scéal seo agus @Gaelport ar Twitter: #Gaeilge