Tuigtear do Gaelport.com go mbeidh an Bille Gaeltachta á phlé ag Leibhéal an Choiste sa Seanad ar Déardaoin ag 4in in áit Dé Máirt 26 Meitheamh mar a beartaíodh roimhe seo.
Foilsíodh an Bille Gaeltachta ar Dé Máirt 19 Meitheamh. Bhí díospóireacht ghinearálta i leith phrionsabail an Bhille sa Seanad Déardaoin seo caite 21 Meitheamh inár léirigh Seanadóirí ó gach taobh den Teach imní faoin deifir a bhí ar an Rialtas an Bille a achtú gan mhionscagadh air.
Níor aontaigh roinnt Seanadóirí leis an gclár ama a leagadh amach chun leasuithe i dtaobh an Bhille a mholadh inár tugadh níos lú na 24 uair an chloig dóibh aon leasú a mholadh. Bhí i gceist an an Seanad an Bille a phlé amárach (Dé Máirt) ach tá sé curtha siar anois go dtí Déardaoin 28 Meitheamh ag 4in.
Meastar gur toradh é seo ar líon na leasuithe atá faighte i dtaobh an Bhille.
Thug an tAire Gaeltachta Dinny McGinley, T.D. óráid phaiseanta sa Seanad Déardaoin seo caite ina ndúirt sé go bhfuil an Stáit tar éis 10 mbliana a chaitheamh ag plé an Bhille Ghaeltachta – idir fhoilsiú an Staidéir Cuimsitheach Teangeolaíoch ar Úsáid na Gaeilge sa Ghaeltacht agus an Straitéis 20 bliain don Ghaeilge chomh maith le plé leathan ar chúrsaí Gaeltachta i dTithe an Oireachtais. Lean sé air ag rá go bhfuil an Bille seo ag bronnadh ról ceannasaíochta ar mhuintir na Gaeltachta agus ag tabhairt deise dóibh ról a imirt i dtodhchaí a gceantar féin.
Léirigh roinnt Seanadóirí a n-imní maidir leis an easpa daonlathais a bhainfeadh le deireadh a chur le toghchán Bhord Údaráis na Gaeltachta agus an easpa tacaíochta airgeadais a bheidh á chur ar fáil d’eagrais a bheidh ag ullmhú pleananna teanga dá gceantar.
Le Ferdia Ó Mongáin, Gaelport.com
© Foilsithe ar 25 Meitheamh 2012
Seans go mbeidh suim agat sna scéalta seo a leanas:
Bille Gaeltachta le plé sa Seanad Déardaoin
“Easpa Ionadaíochta” a deir Comhdháil Náisiúnta na Gaeilge faoi Bhille na Gaeltachta
Lean an scéal seo agus @Gaelport ar Twitter: #Gaeilge #bille